ក្រោយពីថតរឿងភាគ «សិសិរដូវក្នុងបេះដូង» មិនទាន់ចប់ស្រួលបួលផង ពេលនេះ តារាចម្រៀងមុខស្រទន់ សុគន្ធ នីសា មានឱកាសបានចូលរួមសម្តែងនៅក្នុងរឿងភាគទីពីរ ដែលមានចំណងជើងថា«រាជនីភូមិគ្រឹះ» ជារឿងដែលមានការតុបតែងខ្លួនជំនាន់បារាំង ។ អ្នកគាំទ្រជាច្រើន សុទ្ធតែនិយាយថា សុគន្ធ នីសា និង កាន់តែមានប្រជាប្រិយភាពបន្ថែមទៀត ក្រោយពីលេចមុខនៅក្នុងរឿងភាគបន្តបន្ទាប់គ្នានោះ ។ ហើយអ្នកខ្លះទៀត បាននិយាយថា មួយរយៈចុងក្រោយនេះ រាសី សុគន្ធ សីសា ឡើងខ្ពស់ត្រដែត តែម្តង ។
ក្រោយពីហក់ចូលក្នុងផលិតកម្មហង្សមាសជាថ្មី គេសង្កេតឃើញថា សុគន្ធ នីសា មានសកម្មភាពថ្មីៗជាច្រើន មានទាំងការច្រៀង សម្តែងរឿង និង ធ្វើជាគណៈកម្មការនៅក្នុងកម្មវិធីប្រលងចម្រៀង The Voice Cambodia ដែលមានទទួលបានការគាំទ្រនិងកោតសរសើរមិនដាច់ពីមាត់អំពីរូបសម្រស់ និងការវាយតម្លៃប្រកបដោយសច្ចភាព ព្រមទាំងចេះលួងលោមក្មេងអោយមានការអភិវឌ្ឍប្រកបដោយសក្កតានុពល។
អ្វីដែលកត់សម្គាល់នោះ ក្រោយពីក្លាយជាតួឯកនៅក្នុងរឿងភាគដំបូង «សិសិរដូវក្នុងបេះដូង»ដែលត្រៀមនឹងចាក់បញ្ចាំង នៅដើមខែកញ្ញាខាងមុខនេះ ។ សុគន្ធ នីសា ក៏មានឱកាស បានសម្តែងរឿងទីពីរ ដែលបានក្រុងពាលី កាលពីព្រឹកថ្ងៃទី ១១ ខែសីហា នេះ ។
រឿងភាគ« រាជនីភូមិគ្រឹះ» ជារឿង ដែលមានការតុបតែងខ្លួន តាមបែបសម័យបារាំង ។ក្រៅពី សុគន្ធ នីសា ជាតួធំ រឿងនេះក៏មានការចូលរួមពីសំណាក់តារាចម្រៀង និង សម្តែងស្រីប្រុសជាច្រើនដួងទៀត មានដូចជា សុខ ស្រីនាង លី ម៉ារីណា ចន ច័ន្ទលក្ខិណា សាន ស្រីឡៃ សូដា នីតា លោក ហ្សូណូ និង ណុប បាយ៉ារិទ្ធ ជាដើម ។
សម្រាប់តារាចម្រៀង រូបស្រស់ សុខ ស្រីនាង សម្តែងជាតួជំនាន់ក្មួយ ។ រឿងភាគមួយនេះ ដឹកនាំសម្តែងដោយលោក កៅ សីហា ។ គេរំពឹងថា រឿងភាគមួយនេះនឹងទទួលបានការគាំទ្រច្រើនពីសំណាក់មហាជន ព្រោះមានការចូលរួម សម្តែងដោយតារាល្បីៗជាច្រើន ដែលមានទាំងតារាសម្តែង និង តារាចម្រៀង ៕
សូមអញ្ជើញទស្សនាឈុតឆាកខ្លីៗ ដែលនឹងចាប់បញ្ចាំងឆាប់ៗខាងមុខនេះ៖
